صندوق الدنيا

زمان كان فيه راجل بيدور بعربيه شكلها غريب جدا و كان بيسميها صندوق الدنيا كان بيبقي فيها زي فتحات كده الاطفال تقعد تبص منها علي شاشه او علي خلفيه يتعرض عليها قصه من قصص الاطفال القديمه سندريلا , الملاك النائم و كتير من القصص القديمه البريئه بتاعة زمان اما انا بقي صندوق الدنيا بتاعي مختلف تماما عن صندوق الدنيا بتاعة زمان هو مش صندوق هو في الحقيقه قزاز العربيه اللي قدام , ساعات و انا في مشوار بتصادف انه مفيش مكان اركن بما ان القاهره اصبحت و لا اغنية عدويه زحمه دي بقت حاجه اسوأ من الزحمه المهم طبعا بتضطر ان اقعد في العربيه و اللي معايا هو يروح يخلص اللي جايين علشانه طبعا بيبقي القعاد في العربيه ممتع و دقايق الانتظار بتبقي تقيله قوي تحس ان كل دقيقه ساعه بحالها طبعا مبيبقاش قدامي غير اني اقعد اتفرج علي اللي رايح و جاي و اتفرج من صندوق الدنيا

لاحظت حاجات غريبه قوي الناس بقة بتمشي في الشارع سلوكياتها بقة غريبه ده بيتريق علي ده و ده مشغول في الموبايل معندوش إستعداد انه يركز في اي حاجه تاني و ماشي عمال يخبط في ده شمال و يمين و واحد ماشي وهموم الدنيا كلها علي وشه و دي ماشيه بطريقه غريبه جدا طريه مستفزه و مش فاهمه ليه هي بتمشي كده و من وقت للتاني بتييجي عيني في عين اللي ماشيين ده غير بقي أجزاء المناقشات و الحوارات اللي ممكن احيانا تفهم منها المناقشه كلها عن ايه و ساعات يدفعني فضولي اني افكر ممكن يكونوا بيتكلموا عن ايه بس فعلا هو صندوق العجايب كمان مش الدنيا بس لأن يتمر عليا مواقف و احاديث غريبه بكل الاشكال ساعات بتحس ان اللي بيتكلم عنده وجهة نظر و ساعات تحس انه بيتكلم لمجرد الكلام نوع من انواع التعبير عن الذات اهه كله كلام و ياسلام بقي لو في حاجه مثلا خبر او مشكله عامله قلق في البلد بشمع شوية كلام يعني الحقيقه انه ساعات بيبقي معقول و ساعات بيبقي كلام في اللامعقوليزم مالوش اي معني اصلا بس تحت اي بند اللحظات دي ساعات بتفرق معايا لأني بقيت الاحظ ان الناس بقة تتصرف علي راحتها قوي في الشارع لدرجة اني بحس انهم اصلا مش شايقيني او شايفين اي حد تاني بس اللحظات دي بتضيفلي كتير وفي وجهة نظري للأمور و ساعات بتسيبني محتاره مش عارفه اقرر احس بأيه تجاه اللي انا شايفاه