Friday 31 December 2010

باليل

ساعات باليل في حاجات بتيجي في دماغ الواحد بس بتبقي غريبه قوي , كأن الليل بيصحي جوانا طاقه غريبه سواء بقي طاقه سلبيه ولا إيجابيه المهم انه في حاجه جوانا بيطلق سراحها , في اليوم ده بالذات كنت تعبانه جدا , كان عندي دور برد غريب لا هو شديد و لا هو عادي بس كان تاعبني قوي , كان عندي فيلم علي الكمبيوتر كنت عايزه اشوفه بشكل فظيع و كأنه واجب لازم اعمله كان في حاجه جوايا بتقولي انه اكيد مميز في حاجه فيه شدتني عمتا انا دايما بصدق في موضوع الصوت الغريب اللي جوانا اللي ساعات بيحركنا او بيقولنا علي حاجات مش واضحه بس بعد كده بنكتشف انها صح , اليوم ده باليل قررت اني استكمل فرجه علي بقية الفيلم و بالرغم من ان الفيلم مش بيتكلم عن حاجه مثلا صادفت انها في حياتي برضه بس معرفش ليه حسيت انه بيتكلم عن جزء مني جزء عمري ما ناقشت حد فيه جزء احتفظت بيه لنفسي بس علي العموم انا عندي قناعه ان في اي فيلم بنتفرج عليه و بنحبه او حتي بيعجبنا فاحنا بنحبه علشان لمس حاجه خاصه بينا قوي بشكل معين , الفيلم كان بطله راجل و البطله كانت قصتها مش اساسيه قوي فيه بس كان في حاجه غريبه شداني للفيلم كان فيه لحظات و انا بتفرج عليه كان جزء من الحوار يفكرني بحاجه خاصه بيا كنت اسرح و الاقي دموعي لوحدها فجأه من غير سبب نزلت بالرغم من انه مش فيلم كئيب او فيه حاجه حزينه بس كان عميق قوي لمس مشاعر و فكرني بحاجات كنت بحاول اسكتها جوايا من زمن و بالرغم من اني مبحبش النهايات المفتوحه بس بالرغم من كده  نهاية الفيلم عجبتني قوي هي صحيح نهايه مش محدده بس اجمل ما فيها انها كلها امل ان في احسن حييجي او ان الاحداث بعد كده حسب التخيل كده فيها نوع من انواع التفاؤل
خلصت الفيلم و اتبسطت كتير بنهايته المفتوحه و أفتكرت اني مغسلتش سناني فقمت اغسلها و انا خارجه من الحمام لاحظت ان الدنيا ابتدت تنور كان في ضوء ضعيف كده معكوس علي الكراسي بره في الصاله قلت اخرج اشوف السما شكلها ايه لأن كان في إحتمال ان الدنيا تمطر , خرجت و بعدين ببص لقيت السما فيها سحاب تقيل قوي بس موجود في جزء واحد بس فس السما و الاغرب انه شاكله زي ما يكون السحاب التقيل ده ما بيمشيش أستغربت قوي هو فعلا واقف مبيتحركش فدققت أكتر لحد ما اخدت بالي انه بيمشي بس براحه قوي جدا لدرجه تخلي الواحد يشك انه اصلا بيتحرك معرفش ليه ساعتها فكرني المنظر ده بأيام و لحظات ساعات بتمر علي الواحد بيحس انها مبتمشيش واقفه و كأن الدنيا رافضه تتحرك لقدام و وقفت علي كده خلاص بس لما الواحد بيدقق بتفكيره شويه بيكتشف انها بتمر بس بتبقي تقيله قوي علي قلب الواحد وقتها بس تفكيري وقف شويه و سرحت قوي في شكل السحاب التقيل و قلت لنفسي اكيد زي ما السحاب ده حيمر و يمشي بعيد و السما ترجع صافيه تاني اكيد المواقف الصعبه في حياة الواحد حتمر ,فجأه لقيت قطتي طلعت علي الكرسي اللي جنبي و عملت صوت معين بتعمله علشان تلفت انتباهي انها عايزاني الاعبها , لاعبتها شويه و انا بلاعبها استغربت قوي قد ايه احنا بنبص للحيوانات احيانا انها مخلوقات من غير مشاعر مع انها كلها مشاعر بالعكس يمكن اميز ما فيها انها واضحه و صريحه في مشاعرها و بريئه جدا عكس كتير من البشر محدده في احتياجتها و أحيانا كتير بتحس بينا من غير حتي ما نتكلم او نقول اي حاجه من اللي جوانا